全因有你

學校最八個位媽咪終於畀我不留情面地話左一輪‧

關於咩事詳見 "八卦都要有限度"‧

咁噚晚如常地帶隻豬去公園玩，玩左一陣梁太帶埋大女出現，梁太掉低個女畀我地就走左去‧

返黎之後都唔夠一陣，走埋黎我度又問我隻豬個日做乜喊到咁勁‧

呵呵呵！俗語有云 - 事不過三，今次係佢第四次問我，各位估我重會唔會忍佢‧

佢問完之後我就用好平靜o既語氣同佢講 "梁太，我唔明點解你係都要問住我同一件事，我想講時我會講，我唔想講時，唔理你係邊位問我幾多次我都唔會講，重有呢件事發生左咁耐，點解你重要死纏難打咁問我，你覺唔覺得你好惹人生厭‧"

佢聽我咁講完已經面色轉晒，不過佢都重要加多句 "咁我唔知你唔鍾意，咪照問你囉！"

呵呵！又死多兩錢重！

我又回佢一野 "我好想講，乜其他人發生左咩事一定要同你報告架，我有選擇權去同邊個講，你並唔係我選擇之列，總之你o既行為，對我黎講係非常騷擾，你明唔明我講乜唔重要，我要講o既係咁多‧"

我講呢番說話時重有另外兩個媽咪係度，當時兩位都無出聲，但係我知道佢地都係有同樣不滿，只係無我咁衰當面話佢‧

跟住我地唔鬼理佢繼續傾偈，要講o既野就講晒，佢唔識趣地閃開就唔關我事‧