洗髮鉀皂 @ 全因有你 :: 痞客邦 PIXNET ::

Well ~~~ 呢篇網誌若果要我好文雅咁寫呢！一定呢世都出唔到嚟，所以唔好介意咁廣東話啵！

噚晚去咗婆婆屋企瞓，咁我嘅整皂大行動又開始，今次係從未玩過嘅 "鉀皂"‧

之前已經聽到好多恐佈事件，搞到我唔敢郁手，但用買返嚟嘅洗頭水我就勁甩頭髮，於是 ............ 的起心肝送上我嘅第一次 ............ 快速加熱法煮鉀皂‧

郁手前都問定 laam 會幾點瞓，最遲可以幾點打畀佢，因為我怕出事

返歸後乜都唔理，換完衫就打畀 laam 問佢拎鉀皂個計算表，跟住量好晒嘢再打畀佢，一路同佢一路開工‧

用嘅煲係 8" 高 & 8.5" 闊口不銹鋼有蓋煲，蓋埋煲蓋成 9" 高，但咪諗住個煲有返咁高就會好安全，其實係好恐怖先啱！

一邊加熱 d 油一邊溶鉀，溶鉀時發現乜 d 鉀咁 "泎" 架，一加水 "泎" 得重勁過開 N，搞掂晒之後就將油離火倒鉀液‧

倒完就開火煮 ...... 起初都無乜嘢，一蓋返個煲蓋落去 ........... 嚟料啦！

第一次煮鉀已經好鬼驚，當時用緊個 "單環小火嘅爐頭" 嚟煲，點知好似火山爆發咁個煲蓋係咁彈下彈下，彈都還好，點知係咁彈埋裡面 d 嘢出嚟，搞到成個爐頭都係，最慘個爐頭隔離係我放碗筷嘅架，咁即係話 d 碗筷都彈到啦！

大家記住，全程我都係同 laam 講住電話嘅，即係話我 d we 嘩鬼叫同個煲蓋 d "啪啪聲" 佢係好清楚，連佢都話無可能個煲咁高身都搞成咁，叫我轉用另一個爐頭嚟煲，咁之後發生嘅嘢會部都係 "細環細火嘅爐頭" 囉‧

轉咗爐頭當然繼續煮喇，今次彈煲蓋嘅情況好咗，無起初咁恐怖，叫做無彈到周圍都係，唔使抹餐死 (呢邊爐頭咋)‧

煮咗一段時間 laam 叫我開蓋睇下係點 ~~~~~~ 嘩 ~~~~~~ d 嘢好似火山爆發咁 ~~~~~ 好嘔丫 ~~~~~

咁因為個煲身好高，再加上我人又矮，搞到要用腳尖企之後多角度咁望先望到煲嘢係咩死款囉

laam 叫我報告咩死款，咪話好多白泡嘔緊囉，係晒個中間位度滾丫滾，佢話要開始加水降溫 ................. 點加 .......... 好驚丫 ....... 我驚加水時會爆漿......... 毀容丫 ........

各位記住！我同 laam 講嘢係乜衰嘢都講得，
所以諗歪少少就會好明我想表達 d 咩！

如是者就不停加水加水加水，到差唔多時 laam 叫我蓋返個蓋等煲嘢自煮，之後先熄火睇下變成點‧

好啦！開蓋啦！好似有好多都透咗，laam 叫我攪勻堆嘢睇下有無變做奶奶地色，咁未得喎，於是又再加水再煲過‧

d 驚嚇場面差唔多完晒，但唔知點解 ............ 硬係唔透，咪再加水加水加水 ..........

前前後後呢度都煮咗差唔多四十分鐘，但呢次出事啦！

可能焗得太耐 ......... 搞到好乾好乾，laam 叫我再加半碗水落去攪返開堆嘢，但好不幸係已經攪唔開，唯有再開火睇下會唔會熔得返 .......... 各位估到啦 ......... 係唔得嘅‧

laam 就叫我用少少嚟開水 check pH 係幾多，咦！好正啵！7 同 8 之間，即係舊嘢搞掂晒，咁就畢出嚟入膠盒放保溫袋 lu‧

總之整呢壇嘢用咗成個鐘，laam 係咁聽我 we 嘩鬼叫成粒鐘，真係辛苦晒你！