全因有你

你對左個女咁多年，係咪唔知我脾氣係點先‧

頭先大哥通知我爸爸突然一隻眼睇唔到野，即刻送左佢去急症室，醫生睇完後話係白內障惡化，寫信轉介去眼科，聽朝去專科門診排期‧

我係電話同二哥講聽朝會陪爸爸去醫院，佢就係咁話唔使唔使，自己一個人去就得‧

呢野唔叫聲你大佬都唔得囉！你視力完全正常我會唔會連排期都要陪你先，你係一隻眼睇唔到野，係去醫院途中有事咁點算‧

講左一大輪佢都重係咁 .................. 即係要我發火啦！

跟住我叫左爸爸聽電話，只係同佢講一句 "你聽朝係都要自己一個去醫院丫嘛，好！我即刻抱埋你個孫過黎，最多聽日佢學都唔返囉！"

佢聽到我咁講即時唔敢再出聲，之後問我幾點去接佢‧

點解你硬係要我發惡你先肯聽人講野，我地個個都係擔心你咋！好聲好氣同你講永遠當我無到，搞到我想扮溫柔都唔得‧

幾兄弟姊妹個個都知要搞掂兩老乖乖聽話一定要由我出手，事關我係屋企最鬼惡o既，講完唔聽要我發惡當真天皇都無面畀，所以................我永遠都係做衰人囉！